兩分鐘偷睇微生物世界
一個健康嘅口腔充滿生機，原來住咗10億個微生物喺入面，當中一般大約有700種細菌，都仲未計真菌同埋其他嘢。
細菌可以生喺牙齒、牙齦同條脷上面，亦都長期佔領住面頰裡面同埋喉嚨嘅黏膜上面…… 即係個嘴入面所有嘅窿窿罅罅！
咁又唔使驚嘅，因為只有小部分壞菌係會整壞啲牙。大多數細菌都係冇害嘅，有啲甚至對人有益，例如益生菌會幫助消化。
平時我哋都食唔少加工食品，當中梗有糖份高嘅零食。食得多除咗易肥之外呢，亦都容易引起蛀牙。
衰菌好菌嘅較量
有啲壞菌就鐘意消化嘴裡面嘅糖，我哋食完嘢之後，轉糖鏈球菌（Streptococcus mutans）同乳酸桿菌（Lactobacillus spp.）會利用殘留喺牙罅之間嘅糖嚟生長同代謝產生乳酸，咁酸性嘅環境就會腐蝕牙齒。而健康嘅口腔入面都有啲益菌會產生鹼性物質嚟平衡返個酸鹼度，亦會產生抑制壞菌生長嘅抗菌蛋白質，保持好壞菌之間嘅生態平衡。
不過，如果呢個微生物生態一旦失去平衡，就會產生蛀牙。食咗太多碳水化合物係會助長啲壞菌生長，令本來佔大多數嘅益菌冇咗優勢，令酸鹼度降得再低啲。而蔗糖仲會令壞菌產生牙菌膜，黐喺啲牙齒表面，引致蛀牙同牙石等問題。咁牙菌膜越多，酸性物質同牙齒嘅接觸就越多。
刷牙可以刷走殘留喺牙罅之間嘅食物，防止微生物積聚，避免牙菌膜產生。但係每次刷牙之後，細菌係會再次滋生。所以，我哋每日都要正確刷牙同埋用牙線清潔，保持牙齒健康。
記得每晚都要刷淨棚牙至好去瞓喎。
(原文刊登咗喺《樂鋒報》2021年5月號，呢篇係粵文加拎版。)
睇埋：4 Fascinating Things Scientists Know About the Billions of Bacteria in Your Mouth - [Johnson & Johnson網頁]
Comments