兩分鐘偷睇微生物世界
腸道微生態
「益生菌」即係被認為可以促進腸道健康嘅微生物，當中含咗好多嘅細菌種類，多啲人識嘅有乳酸桿菌（Lactobacillus）同埋雙歧桿菌（Bifidobacterium）。而一般所謂嘅「乳酸菌」，係泛指嗰啲能夠喺代謝作用中產生乳酸嘅細菌。喺1900年代，微生物學家發現習慣食乳酪嘅保加利亞人好長命，後嚟就發現咗保加利亞乳酸菌（Lactobacillus bulgaricus），係依家廣泛用喺生產乳酪嘅主要細菌。
我哋身體入面有數量龐大、非常多樣嘅微生物，呢啲「微生態系統」遍佈喺眼、口腔、皮膚等部位，而腸道微生態裡面就有數量最多最複雜，包括細菌、病毒、真菌等一千多種微生物。
腸道健康提升免疫力
越嚟越多科學家著手研究各種益生菌。近年就有研究報告指，益生菌可以維持腸道微生態嘅平衡，幫助提高人體免疫力。本港亦有大學利用咗「總體基因體學」技術同埋大數據分析，針對一啲病人腸道微生態失衡嘅問題，去研發益生菌組合配方，希望未來可以製成補充劑，加入到日常飲食，用嚟促進腸道健康，希望增強免疫力。
近排喺市面上湧現咗好多益生菌產品，仲話「科學實證」改善健康嘅聲稱嚟宣傳，調理腸胃、抑制過敏，甚至防癌等林林總總嘅益處。但到目前為止，呢啲聲稱都仲係有待更多嘅科學數證據支持。所以，如果你真係好鍾意乳酪嘅美味，當然唔怕每日食多少少。但係唔洗嘥太多錢去買太貴嘅益生菌補充劑。
(原文刊登咗喺《樂鋒報》2021年7月號，呢篇係粵文版。)
睇埋：
中大醫學院研究指出優化腸道微生態有望提升新冠疫苗安全及成效 [2021年3月31日 中大文宣]
Comments