來，探索海底！

水肺潛水 SCUBA diving

一般人如果閉氣汆水，通常最多兩分鐘就要浮返上水面換氣，唔可以「潛」得好深。專業潛水員須要考到潛水牌，就能夠用簡稱水肺 [1] 嘅裝備下潛到50米嘅深度。呢個係揹喺膊頭上嘅水下呼吸器，包括有氣樽、潛水鏡同埋呼吸管。潛水衫用防水橡膠料縫製，有分乾濕兩類喺唔同嘅環境咁著。

[1] SCUBA係自給式水下呼吸器 Self-Contained Underwater Breathing Apparatus 嘅縮寫

聲納 SONAR

聲納 [2] 係一種聲學探測裝置，原理係由聲納儀器發出聲波脈衝訊號，聲波撞到障礙物之後反彈返嚟，再由接收器探測回音；儀器量度聲波來回嘅時間就能夠計算出水中物件嘅距離。科學家用聲納嚟定位浸咗喺水入面嘅嘢，仲可以測繪海底地圖。此外，漁船亦都會用聲納去搵海裏面嘅魚，判斷啲魚嘅類型同大細。

[2] 聲納（SONAR）英文全稱係Sound Navigation And Ranging，中文譯名為聲音導航與測距。

潛水器 Submersible

潛水器即係喺水下操作嘅小型交通工具，體型比起潛水艇細啲。有好多唔同類型，可以分為有人駕駛同遙遠控制兩大類。佢哋用途廣泛，例如做海洋學研究、水底考古、勘探海底資源同拍攝等。2013年，浸會大學嘅邱建文教授坐蛟龍號潛水器，潛落1300米深嘅冷泉考察，係本港首名潛入深海考察的科學家。

圖：良友之聲5月號

原文登咗喺《良友之聲》5月號，呢篇係粵文加拎版。