G for Glacier 冰川
通常喺南北兩極，或者喺好鬼高同埋終年冰封嘅山上都可以見到冰川。如果一笪地方落雪嘅速度快過融雪嘅速度，啲積雪一層層疊高，就會慢慢形成冰川。愈嚟愈厚又重嘅積雪壓住下面底部嘅雪，慢慢變成一舊非常龐大又非常重嘅冰川。「冰向低流」，冰川會沿住山坡慢慢向下瀡落去，就即係一條結咗冰、流得極緩慢嘅冰河。
I for Iceberg 冰山
冰山係本來喺陸地上面嘅冰川分裂（不含煽動成份）咗跌落海嘅巨大冰塊。冰山通常只有十分之一嘅山巔部分露出水面，佢九成嘅體積就浸喺水下面，我哋係冇乜可能判斷佢隱藏咗喺水面下的形狀。所以，喺海面四圍漂移嘅冰山對於船隻係好危險㗎。成語「冰山一角」tip of the iceberg 就係用嚟比喻所暴露啲事情只係真相嘅一小部分嘅意思。
S or Sea Ice 海冰
喺極度寒冷嘅天氣下海水會凝結成海冰（因為有鹽同其他雜質，海水嘅凝固點係喺攝氏-2°度左右）。每年冬天，北冰洋面俾海冰覆蓋。 到咗夏天，有啲累積得好厚嘅海冰唔會完全熔化晒，所以某啲部份嘅北冰洋係終年結冰。但係自1979年起科學家開始用衛星觀測以嚟，夏天剩低嘅海冰面積愈嚟愈細。喺2012年8月，海冰覆蓋嘅範圍仲是有紀錄以來最細嘅面積。
海冰、冰山同埋冰川都有助保持極地寒冷，因為佢哋白雪雪嘅表面能夠將70％陽光反射番上太空，減少地球表面吸收嘅熱能。但係當海冰融化露出咗海洋表面，海水則只能反射10%嘅陽光，咁樣即係吸收90%陽光嘅能量。海洋變暖令海冰減少，意味住地球表面所能反射嘅陽光會持續減少，結果地球吸收更多熱能，溫度上升形成加促海冰融化的惡性循環。
原文登咗喺《良友之聲》2022年1月號，呢篇係粵文加拎加長版。
תגובות