C for Clownfish 小丑魚
珊瑚礁裏面有啲動物係共生關係，即係話佢哋需要互相幫助先至能夠生存。小丑魚同埋海葵就係好例子：海葵有毒嘅觸手能夠攻擊魚類，不過小丑魚因為身體表面嘅黏液，能夠對海葵嘅毒素「免疫」，所以佢可以匿埋喺海葵嗰度得到保護，避開想食佢嘅大魚。而佢就會幫海葵打掃，仲趕走海葵嘅捕食者。
D for Dolphin 海豚
大概係因為經常微笑咁樣嘅表情，海豚天生就係社交KOL，會成日聚埋一齊玩同狩獵。佢哋亦有驚人嘅聽力，識得靠迴音嚟定位，能夠知道障礙物或者獵物嘅準確位置。佢哋嘅智慧好鬼高，仲會同漁民合作，夾手將啲魚引到漁網中。身體帶粉紅色嘅中華白海豚係本港最受歡迎嘅海洋動物之一。
E for Emperor shrimp 帝王蝦
身型細小嘅帝王蝦只有2厘米長，身體呈橙色到紅色，背部通常有白色斑紋。佢哋同顏色鮮艷嘅海參同埋俗稱「海兔」嘅海蛞蝓都係共生關係。因為顏色相似，所以冇咁容易俾獵食者察覺。帝王蝦會騎係海兔同海參身上搭順風車，一路坐車一路食佢哋身上嘅便便同垃圾，咪又即係幫手清潔囉。
原文登咗喺《良友之聲》12月號，呢篇係粵文加拎版。
睇埋：Let’s learn about coral reefs - Science News for Students網站
Comments