海洋 B C D

B for Bathyscaphe 深海潛艇

喺倫敦科學博物館嘅的里雅斯特號模型

深海潛艇的里雅斯特號 Trieste 外型似隻飛船，長16米，佢堅硬嘅外殼能夠頂住壓力超大嘅深海。1960 年，瑞士探險家皮卡德同埋美國海軍上尉沃爾什一齊駕駛佢下潛，用咗4粒幾鐘去到「挑戰者深淵」。不過佢哋喺嗰度只係逗留咗廿分鐘，就又要花4粒鐘返上水面，完成咗史上第一次喺太平洋最深處考察嘅任務。

C for Challenger Deep 挑戰者深淵

挑戰者深淵係世界海洋中已知最深嘅地方，距離海面11公里（仲遠過由上環行去筲箕灣），喺西太平洋馬里亞納海溝 Mariana Trench 嘅南端。自1960年起，世界各地都有探險家嚟挑戰呢個深淵。2012年，名導演占士金馬倫駕駛深海潛水器下潛到呢度，係首位隻身潛入地球最深處嘅人，佢喺呢度逗留咗3小時。 James Cameron Descends 7 Miles Into Pacific Ocean's 'Desolate' Mariana Trench

D for Deep sea 深海

深海絕對係神秘嘅世界。由海面向下潛，光線會逐漸減弱。去到水深大約1000米就會完全冇陽光可射到落嚟，所以溫度急劇下降，呢處開始咗又凍又黑嘅深海區域。喺下面海水加埋嘅重量，越深水壓力就越大。深海海底平均深度係4000米咁上下。雖然環境咁嚴峻，不過都仲有唔少適應力驚人嘅生物住喺呢度。

海洋科學家將海洋劃分為五層。最頂嘅表層係透光帶（0 - 200米），嗰度陽光充足，係可以進行光合作用嘅深度。喺透光帶下面係中層帶（200 - 1000米），光線會逐漸變暗，所以又叫做「黃昏區」，呢度微弱嘅光線並唔足以俾植物進行光合作用。再下面係完全冇光嘅半深海帶（1000 - 4000米），又叫做「午夜區」。深海帶（4000 - 6000米）係海洋嘅底部，呢度嘅壓力足以將我哋壓扁。喺平均4000米嘅深海盆地底部仲有更深嘅超深淵帶，係海洋最深深深嘅地帶，目前已知最深可達10900米。

原文登咗喺《良友之聲》11月號，呢篇係香港話加長加拎版。

睇埋：The Deep Sea - 撳入去越碌越深搔好多深海生物。