今年起我會為《良友之聲》寫啲海洋科學知識，以下係輕鬆啲嘅香港話版本。
A for Anglerfish 鮟鱇魚
鮟鱇魚有好多種，又名燈籠魚，有啲住喺深海，如圖中嘅韋氏蟾蜍角鮟鱇。佢哋啲牙齒又尖又長，頭上有枝「魚竿」，末端有個靠細菌發光的「燈籠」。佢哋會潛伏喺沙裡面，伸出鮮明又出眾嘅燈籠搖晃嚟餌誘獵物，就像漆黑中嘅螢火蟲一樣…… 佢個嘴好巨大，肚亦好有彈性，能將比自己體形大兩倍嘅獵物整隻吞落肚！
B for Blobfish 水滴魚
水滴魚住喺海平面以下1300米又寒冷又黑暗嘅深海。佢只有好少肌肉，骨頭又唔多；身體俾海水重量壓成啫喱狀，但咁反而能承受巨大嘅壓力。佢淋啤啤嘅身體具有浮力，可以好舒適咁喺海底漂浮，而唔洗消耗太多能量嚟游水。佢因為傷心嘅表情而被稱為世界上最醜嘅動物！So sad~
C for Coral reef 珊瑚礁
珊瑚礁生長喺清澈嘅熱帶海洋，由數以萬隻珊瑚蟲構成。珊瑚蟲喺海水中提取碳酸鈣，緩慢咁築成堅固嘅珊瑚礁。澳洲大堡礁係世界最大嘅珊瑚礁群，係潛水員嚮往嘅旅遊勝地。珊瑚礁亦都係好多海洋生物嘅屋企：海葵、海綿、蝴蝶魚、龍蝦、石斑、海龜都會住喺呢度。
良友之聲出版社 https://www.vaphk.org
Comments