兩分鐘睇完生物科技（八）
之前都講咗唔少遠古同經典嘅生物科技，今次講吓摩登啲嘅：胰島素 — 人類史上第一個用生物科技造嘅藥。
胰島素係一種由胰臟分泌出嚟嘅蛋白質賀爾蒙*，負責控制身體血糖水平。血糖中嘅「糖」係嚟自身體消化澱粉質所產生嘅葡萄糖，食嘢之後血糖升高，胰島素就會出動，迅速降低血糖返去正常水平，否則就會引發糖尿病。
身體唔夠胰島素點算好？
科學家喺1920年代發明咗由哺乳類動物中抽取胰島素嚟醫糖尿病人。但係過程又煩又貴，例如，喺每隻豬抽到出嚟嘅胰島素淨係夠俾1位糖尿病人用3日。加上豬胰島素嘅蛋白質結構同人胰島素有些少唔同，只係幾個氨基酸嘅分別就足以引起病人免疫反應嘅副作用。
20世紀生物科技急速發展，下面係開發人類胰島素嘅時間線：
1952年：英國桑格(Frederick Sanger)搵出胰島素嘅胺基酸完整序列。
1953年：華生(James Watson)與克里克(Francis Crick)發現DNA雙螺旋結構。
1961年：科學家破解咗遺傳密碼。
1967年：第一台自動蛋白質測序儀問世。
1972年：第一次利用DNA連接酶將DNA片段黐埋一齊。
1973年：美國科恩(Stanley Cohen)與博耶(Herbert Boyer)用細菌基因做咗第一個重組DNA實驗。
1978年：第一次利用重組基因細菌整人類胰島素出嚟。
1982年：美國FDA批准第一個生物科技藥物，重組大腸桿菌生產嘅人類胰島素推出市場。兩個好使好用嘅生物分子工具
限制酶(restriction enzyme)好似一把DNA較剪，而DNA連接酶(DNA ligase)就好似DNA膠水。要重組基因，首先科學家喺實驗室人工合成負責生產人類胰島素嘅基因，然後用限制酶喺細菌嘅質體剪一吓。咁樣，嚟自兩個唔同生物嘅基因就有相配合嘅駁位。跟住，用DNA連接酶將兩個基因黐埋。基因重組咗嘅大腸桿菌喺生物反應器入面生產出大量人類胰島素，呢個係生物學嘅重大革命。
據估計，依家全球有4億糖尿病人，每年嘅胰島素生產量大約8噸。
*賀爾蒙 (hormone) 係身體分泌嘅化學物質，會隨住血液循環全身，控制身體生長、新陳代謝同埋神經信號傳導。
參考資料：
About Diabetes, International Diabetes Federation 網站
Comments