兩分鐘睇完生物科技（四）
基因係咩嚟？
基因（gene）一詞源自古希臘語γόνος（gonos），有後代、繁殖嘅意思。 細胞入面嘅遺傳密碼 — DNA控制蛋白質合成，而喺好長嘅DNA分子中，一個「基本遺傳單位」就為之基因，即係一段有功能嘅遺傳密碼。
嗰啲人工修改過基因嘅農作物簡稱叫「基改食物」(Genetically Modified Food)，係利用生物科技將新嘅DNA轉移到植物細胞中，所以又叫做「轉基因植物」。細胞喺實驗室靠植物組織培養 (Plant tissue culture) 技術，生長發育成一棵完整嘅植物。
基因食得嘎？
動植物細胞同埋微生物細胞中都有基因，無論係生嘅抑或係煮熟咗，我哋食嘅嘢都含有基因。啲嘢食咗落肚之後身體會將佢哋消化成細小分子，然後再組成身體各部分，其中一啲用嚟製造自己細胞嘅基因同蛋白質。據估計，我哋每人每日都食咗幾十億個基因。
為乜改造基因？
自1980年代起，科學家開始研究修改農作物基因，目的係改良原本植物嘅特性，例如加入抗農藥、抗蟲或抗病毒基因，嚟提高農產量，希望可以增加農夫嘅收入。舊時，農夫可以靠人工選擇，培植出更有價值嘅混種農作物，但係人工選種花時間之餘，農夫仲要夠好彩先可以「溝」得出想要嘅品種。而基因改造嘅優點係，只要科學家知道點樣搵到心儀嘅基因，就能夠「度身訂造」新嘅細胞，問題在於佢嘅DNA剪貼技巧係咪「快、狠、準」。近年，基因改造技術已經發展到可以添加農作物嘅營養、延長保鮮期等，令消費者有更多更好嘅選擇。2017年，加拿大仲開始有基改三文魚推出市場，比普通三文魚慳飼料兼快大啲。
國際科研同監察機構規管咗基改食物幾十年，到目前為止，並冇證據顯示基改食物會威脅人類健康同地球環境。就係因為每一種基改食物都先要通過嚴格嘅審查先可以推出市場，而呢啲農場亦受嚴格監管。但係都仲有人懷疑會有「潛在風險」，加上持續嘅商業、政治同道德等激烈討論，基改食物爭議沒完沒了。[想參與「基因修改大辯論」之前，先睇吓呢個補補底：What is gene editing and how does it work? by Royal Society x Wellcome Trust]
參考資料：
What You Need To Know About Genetically Modified Organisms - IFLScience 網站
Frequently asked questions on genetically modified foods - 世界衛生組織(WHO)報告
Comments